Durante a mañá do sábado 18 de xuño xuntámonos dezaseis persoas para realizar unha marcha nórdica desde o castelo de Fontán e o núcleo máis antigo de Sada até a praia de Veigue. Foi unha iniciativa para nos coñecer un pouco máis quen estamos interesadas no proxecto de vivendas colaborativas LarLilás. Aprendemos as beneficiosas aportacións deste exercicio finlandés nunha camiñada de pouco máis de cinco quilómetros.
E despois sentámonos, nese momento xa eramos dezanove, nunha mesa con empanadas, queixos, tortillas varias, hummus, friames... Apresentámonos e falamos, rimos e comemos, expuxemos as nosas inquedanzas respecto deste proxecto e comezamos a nos organizar en comisións.
Iniciamos así unha andaina sumando soños en común e a iniciamos con entusiasmo, con moitas ganas de seguir traballando e de seguir incorporando persoas que queren tamén unha vellez activa e autoxestionada.
Porén faltaron algunhas persoas interesadas neste proxecto que non puideron participar nesta primeira actividade, mais agardamos xuntarnos todas/os/es na vindeira.
